بالذمة ده يرضي حد عاقل؟؟؟
كل العناوين العنترية التي تناولت الإضراب مثيرة للضحك و الشفقة في آن واحد
الجميع بلا إستثناء تجاهل الفوضى التي خلفتها دعوة للفوضى
و أصبح الناس منقسمون حول من يثبت نجاح الإضراب و من يثبت فشله
لا أستطيع نجاهل أن فكرة الإضراب كانت مبهمة... لا يوجد مطلب واضح رئيسي
لا يوجد إتفاق بين جميع الأطراف على كيفية القيام به أو كيف سيكون شكله
مجرد طلب بعدم القيام بالواجبات (عدم الذهاب للعمل)
تذكرت تلك الخدعة التي تلجأ إليها بعض الطالبات بادعاء ظهور طاريء ما او عدم فهم درس ما و ذلك بالإجماع ليجبروا المدرسة على تأجيل الإمتحان!!!
حد منكم فكر يعلم شخصين فقط القراءة و الكتابة أو حتى تهذيب سلوكهم بدلا من الجلوس على القهوة و المخمخة في فكرة تسبب كل هذا الإرتباك بدون دراسة لجميع جوانبها؟
تعليم شخصين فقط سيجنبنا سرقة المحلات و تكسير السيارات و حرق الإطارات
و إن كان ما حدث ليس بجديد فهو دائما ما يحدث في كل الدول عند حدوث مظاهرات و إضرابات.... الفرق أننا ليس لدينا الكثير لتعويض كل هذه الخسائر فمابالكم بتحسين الأوضاع
أيوه بلدنا مليانة حرامية و خيراتها منهوبة.... لكن يعني هو الناس اللي مش في مناصب كلها شريفة؟؟؟ و إيه المختلف في ده عن البلاد التانية ما كله بيسرق بس بطريقته
أنا لا أرى من الباحثين عن الحرية و مدعي الوطنية إلا جهلا و لسان على الفاضي
هل الأسهل تحقيق خسائر لإقتصاد البلد بدلا من محاولة الإنتاج الحقيقي بحجة المطالبة بتحسين الأوضاع
لا أحب الهروب من المسئولية بدعوى الهدف الأسمى
دعوة هوجاء من شباب أهوج و تأييد من سياسيين مرتباتهم بالآلافات و مكاسبهم كبيرة و مدعي ثقافة جهلاء
وإستغلال من قطاع الطرق و الحرامية لوضع غير محسوب
عرفتوا ليه بنتعلم في المدرسة إن 1 + 1 = 2.... علشان نحسب كل خطوة نحاول نخطيها صح
لا إنتوا هتبقوا جيفارا ولا حتى مصطفى كامل ولازم نفهم نقطة مهمة جدا
إن كل تغيير سياسي بيحصل في بلد بينتج عنه تدهور أكبر وهذا ما يثبته تاريخ مصر بالأخص نحن ننحدر من سيء إلى أسواء و محدش راضي يفتح عينه علشان يشوف و يشغل مخه علشان يفهم
كفاية اللي إحنا وصلناله و كفاية إننا نحاول نحافظ عليه فلا مجال للتقدم طالما لدينا شعب متخلف بهذا الشكل
اللذيذ إن محدش حتى واخد باله إن المجاعة و الكساد الإقتصادي يعم العالم كله و كله بيشتكي إشمعنى إحنا اللي فاكرين إن إضراب غبي هيحققلنا المستحيل
نقطة كمان نفسي أقولها... المدارس اللي إتحرقت في المحلة و عمرو أديب طلب من رجال الأعمال يصلحوها... حقيقي متستاهلش لان اللي عمل فيها كده بكل تأكيد طلبتها و بالتالي أحسن حاجة تتعمل عقاب البلد دي بتركها زي ما هي خربانة تاديبا لناس اللي معرفوش يربوا ولادهم مش مكافئة الحرامية و المخربين بتحسين اوضاعهم
* الصورة من موقع عشرينات
3 محايد ولا متحيز؟:
تقبلي تحيتي
موافقك في وجهة نظرك تماما
وهو ده كلام العقل
لكن بلاش نأسى اوي كده على أهل المحلة
لأن مش كلهم شاركوا في الخراب اللي حصل
مش قسوة على اهل المحلة بس انا شايفة إن ردود الفعل اللي تلت حالة الهمجية دي معناها إن كل محافظة تتحرق على إيد أهلها علشان ينوبهم من الحب جانب
و كأننا بنكافيء المخطيء
ده اللي انا رافضاه
كان المفروض اهل المحلة يدفعوا من جيبهم علشان يصلحوا الخراب اللي حصل مش نكافئهم بالملايين
و عامة دي وجهة نظري وليس فرض على الجميع
من الأول معروف إن فيه قيادات عمالية كانت عايزة تصعد الموضوع.. القيادات دي اللي حرضت العمال تضرب مرتين قبل كدة وهي اللي فكرت الناس هناك بإن قادة الشركة حرامية ونصابين في الوقت اللي كانوا بيقبضوا فيه أرباح من سنين السنين من الحرامية والنصابين من غير ما حد منهم يقول إن الناس دي كانت حرامية ونصابين..
فيه ناس كتير متواطئين في صناعة الإضراب، صحف الحزبوطني اللي بتهاجم الحكومة باستمرار لحسابات حزبية ضيقة ومعتوهة ، دة إدى كارت بلانش لمشاعر الغضب ضد الناس ، بما إنه طالما صحف الحكومة هي اللي بتهاجم الحكومة (على أساس إن لسة فيه ناس كتير بيقولوا إن الحكومة والحزبوطني واحد) يبقى ليه احنا ما نعتصمش وما نحتجش وما نولعش بالمرة..
الأغرب إنك تلاقي دفاع محموم من قبل وزيرة القوى العاملة عن الناس الملايكة اللي مبيخربوش وإن العامل المصري "لايونكن" يخرب أو يضرب وإن الصحف اللي نشرت المعلومات دي عن التصعيد صحف غير مسئولة رغم إن مفيش من الشواهد ما ينفي صحة كلامها -الصحف يعني.. وأن هناك دعم كامل لمطالب العمال هناك بمن فيهم اللي قال يا تصعيد..
دة برضه مش بيدي إيحاء إن الحزبوطني عارف ومشارك ومبارك للي بيحصل ، ومش بعيدة يكون منسق مع المصعدين ومع بعض المنتمين للتيار الشيوعي والأحزاب اليسارية اللي الحزبوطني عارفهم كويس جداً وعارف تحركاتهم.. ودة كله لغرض في نفس يعقوب..
كنت لسة بأعلق عند نائل الطوخي على تدوينة كاتبها عن "فضائية الفوضى" عن إن الناس اللي عملت الكلام دة بدت وكأنها كائنات من الفضاء طالما كل الطلبة اللي في الفصل بيقولوا في نفس واحد: مش أنا يا "مِس"!
تبقى ملحوظة أخرى رداً على تعليق السيدة الوزيرة: عمال المحلة ليسوا كل سكان المحلة ، وتجار بورسعيد ليسوا كل سكان بورسعيد ، وفلاحو الأقاليم ليسوا كل سكان الأقاليم ، ومن الممكن أن يتقاطع السكان مع هذه الفئات في أشياء.. وأن يتنافروا في أخرى.. والله أعلم.. وعذراً للإطالة..
Post a Comment